《香港何濟公止痛退熱散呈獻:中年好聲音3》周日(27日)晚8點翡翠台播出時長長達2.5小時的9強之戰!今集除了繼續有車婉婉擔任主持,固定評審班底肥媽、張佳添及周國豐,還有音樂女神海兒以及著名填詞人潘偉源,齊齊見證8強誕生。

　本回合主題是「改編歌之夜」,9位參賽者演唱歌單如下:陳芷盈《深愛著你》、善玥澄《依然》、劉洋《後來》、王鄭浚仁《愛火花》、李金凱《歸來吧》、占士丁丁《Take me toy our heart》(《吻別》英文版)、趙浚承《霧之戀》、黃博《蜚蜚》及張與辰《拒絕再玩》。為令觀眾對《中3》9強有更深入的了解及認識,今集製作組還為各人安排了單人外景拍攝,相當有心。

　今集一大亮點,是全場唯一自彈自唱的張與辰;大熱門之一的與辰,這次轉玩Sexy風格,以慵懶又有魅力的聲音彈唱《拒絕再玩》,別具個人風格。張與辰事後坦言希望每次站上《中3》舞台,都能帶給觀眾不一樣的感覺:「因為我從來未sexy過,但又冇胸肌所以攞件scarf嚟冚住吓。」婉婉聞言即以手觸碰張與辰的Scarf,並開玩笑謂:「拉低啲咪得咯。」令獻唱時奔放自如的與辰忽然變回怕醜仔,場面搞笑。

　對於與辰表現,評審可說一面倒正評,出名反應王的肥媽與海兒,在台下聽歌時已忍不住相視而笑兼流露讚歎樣,海兒坦言聽完面紅耳熱:「你把聲好似跳緊衣舞咁,可以用聲音做到咁多唔同音色,我覺得可以叫你Ad-Lib王子,好正,真係好少聽歌聽到面紅。」肥媽則笑言聽到「頭赤」:「佢真係唱到不羈嘅感覺,好自然流露出嚟,我覺得任何女人都會畀佢電到。」張佳添則大讚與辰so talented:「呢個比賽才華值你係最高嘅,彈琴叻彈結他叻,識編曲識作曲,識做音樂製作,快歌慢歌rock歌R&B冇一樣難倒你,你sexy係因為你真係一個好有才華嘅音樂人。」嘉賓評審潘偉源:「其實我真係嚟睇show,好精彩嘅音樂會,你今日係一件好精美嘅樂器。」就連出名百彈齋主的周國豐,亦高度評價,並坦言願意為與辰今次表現給出20分滿分:「成件事你有小小唱到靈魂出竅,真係唱得好好,你同隻歌已經合而為一...頭先我用咗至少45秒時間,究竟我係畀19定20分你。」

　同樣吸引評審給出高分數的還有另一位熱門黃博,雖然黃博台上透露不太敢挑戰《蜚蜚》,皆因擔心自己做得不夠好;不過由於獻唱時游刃有餘、歌聲亦極富感染力,結果獲得一面倒好評,超過一位評審認為要扣黃博分數難到不得了,肥媽更笑言不容許黃博以後唱她的歌:「你知唔知你唱人哋嘅歌,人哋有壓力,黃博我哋要喺雞蛋裏面挑番嗰一分出嚟知唔知幾鬼辛苦,但點都要減佢多少嘅,因為佢織冷衫都入咗去(final)喇。你係好投入、好享受你嘅歌,你好有自己。你以後唔好唱我嘅歌呀,唔係偷鬼咗我嘅歌!」海兒:「我哋暫時冇睇到你有駕馭唔到嘅一次,全香港嘅歌手都擔心緊你唱佢啲歌,真係唱得非常之好。」張佳添:「你能夠將呢首歌由microdynamics再去macrodynamics,你簡直帶我哋上山落海,情感好足好澎湃,差唔多perfect。」周國豐:「你今日聲音狀態好好,接近Hi-Fi發燒嗰種狀態,無論感情聲音控制都好好。」◇