今年係毛姐毛舜筠入行五十周年，佢作出一個破格嘅決定，就係獻出佢嘅第一次，同腦細林日曦合作對方自編自導自演的舞台劇《大死撐日》，消息一傳出，所有門券已一掃而空，要加開七場。毛姐更會開金口大唱「查篤撐」。

　毛姐接受HOY《娛樂頭條》主播Angela俞詠文嘅專訪，自爆本來兩度被邀演舞台劇，最終都因為懷孕而取消，今次終有機會演出，完全係打破魔咒：「因為所有事情都唔係刻意安排，其實一次係《我和春天有個約會》，另一次係《煙雨紅船》，都係因為我有咗大女同二女，所以喺唔同嘅時間都做唔到啦，我以為自己唔會再有機會做，所以到林日㬢搵我嗰陣時，我係有啲意外，心情都好興奮，但係有小小忐忑同擔心，當然一定唔會再大肚啦，所以我同佢講，今次應承咗唔知會唔會有意外，唔知生咩，會唔會生癌呢？哈哈哈﹗佢當時即刻都講唔好講呢啲嘢啦，佢八月搵我，到十月我真係發生一啲事，真係生嘢，不過係生咗骨刺喺我尾龍骨L5嗰節，因為佢壓住咗我嘅坐骨神經，我痛到唔行得，當時我最大嘅顧慮喺我要做舞台劇，如果係我做舞台劇時突然發生，我就唔做得。於是我決定做手術，好在手術超級成功，我就話畀林日曦聽，所有嘢都好順利，等我休息吓我哋就可以繼續㗎啦。」

　毛姐之所以答允參演，是她首次看劇本就被吸引：「咦﹗好似你為我而寫喎，你係咪起咗我底呢？你要好了解我先可以寫一個同我成長背景好相似嘅劇本，佢就話無喎。劇本話我爸爸係一個唱大戲嘅人，而我細個時屋企一個星期有幾晚都係有啲中樂團嘅樂隊來演奏，之後就有人唱，我爸爸就係其中一個唱嘅，所以我以為佢知我識唱大戲先搵我，原來佢完全唔知嘅。」腦細搵完毛姐後，重新再寫過劇本，心急嘅毛姐每朝都等收訊息，希望可第一時間睇到，豈料誤將對方嘅號碼封鎖，直至有朋友問她舞台劇已賣飛，她再查手機才解封對方，及後歌曲、音樂都希望第一時間聽到，由於該曲是由林日曦寫的粵曲，她承認初時有啲抗拒：「直到我學嘅時，當然唱過好多次啦，嗰旋律不斷喺我腦入面盤旋，好似揮之不去咁，我突然覺得我鍾意首歌，希望日後愈唱愈好。」

　講到入行五十年，佢就覺得時光飛逝：「好似噚日先發生，而家我嗰女已經31歲，我都係覺得佢仲係小朋友，時間真係過得好快，最大嘅心願係健健康康就夠啦﹗」◇