陳蕊蕊日前為食品公司拍攝網片，片中蕊蕊走訪各大餐廳探討食店現況，其間蕊蕊不時「試食」餐廳招牌菜，更乘機向負責人「偷師」營商之道：「我其實都識煮嘢食嘅，整甜品會叻啲，因為我之前開過Café；，不過一個人住都冇乜機會下廚。今日真係要嚟偷師，因為之前做過咁多生意都係蝕錢，最勁嘅一次幾十萬左右啦，不過做生意算少㗎啦。」

　近日疫情嚴重，蕊蕊坦言會小心個人衛生，停機後即戴口罩：「平時就唔會去多人嘅地方喇，我自己就打齊針㗎啦，而且幕後同事都會戴晒口罩，所以都唔太擔心嘅。今日去到餐廳都知道情況幾嚴峻，因為冇晚市對大家打擊都好大，我只係小人物當然幫唔到啲咩，希望可以幫手打打氣、介紹吓啲隱世美食，到疫情過後大家去瘋狂幫襯！」

　新春在即，蕊蕊無懼拜年被親友「催婚」：「我屋企人其實好少問呢啲問題嘅，父母都明白我做呢行，唔會去到過年先問我呢啲嘢，平時都會旁敲側擊關心我嘅感情狀況。」◇