TVB藝員「送水輝」JackHui許家傑早前出席善寧會舉辦嘅「我們這一『家』發佈會」，許家傑及可愛唐狗Queenie拍檔成為「親善大使」，推廣生死教育及關愛晚晴嘅訊息畀現場觀眾，吸引大批市民到場支持，分批參觀位於沙田賽馬會善寧之家。

　九龍西醫院聯網總監羅振輝醫生喺分享會上，坦言近日電影《破‧地獄》上映，推動生死課題，而佢媽媽選擇喺善寧會度過最後日子，安然離開，今次以過來人分享感受。

　許家傑曾經歷過親人同愛犬嘅離世，體會傷痛所帶來嘅影響，佢學懂更加開放去提出「死亡」呢個一般人忌諱嘅話題，日後唔好淨係問人食咗飯未：「可以試下問你幾時死？哈哈，不過好似太直接，但我意思係患咗重病之後點去決定急救唔急救、或者身後事安排等，呢啲唔應該再要避忌，越係親嘅人越要勇敢分享，咁先將人生最後階段安排得最好。」

　許家傑印象好深有次收到院友心願，探望晚期病人：「當下唔知可以做到啲咩，但完成佢嘅心願，都總算係幫到人。當時見到病者個細仔好內向冇乜講嘢，唔係好接受到，我好簡單送上一個擁抱，只係想畀佢哋呢班照顧者知道，佢哋唔係孤單。」

　許家傑先後多次探訪該院院友，今次探望嘅黃伯相當精神，見許家傑到場非常興奮，黃伯讚許家傑高大威猛，一眼就認出佢係每晚播處境劇《愛‧回家之開心速遞》嘅送水輝，院友們最喜歡就係追睇《愛‧回家》，許家傑指黃伯好叻好樂觀，同對方傾偈有好多得著，黃伯人生金句就係「活在當下」，到人生最後階段最重要係開心，唔好諗咁多，珍惜呢刻好好享受。◇