一連四場的長壽音樂劇傳奇《我們的青春日誌》6日於葵興爆炸戲棚劇場正式上演，歌手黎展峯（Andy）獲英皇集團主席楊受成「欽點」出演，擔正做男主角之一Alex。首次挑戰音樂劇，Andy坦言壓力大到爆之餘，更謂完show後見到全場觀眾嚇親！

　Andy出演音樂劇，背後原來有段故。音樂劇導演Tom於完show後謝幕時親自解畫，話說在港台頒獎禮機緣下，聽到Andy唱Live的歌聲，覺得非常不錯。之後在另一個機緣下，Tom膽粗粗直接向楊博士開口，結果楊博士二話不說，親自「欽點」Andy擔任《我們的青春日誌》男主角。Andy得知真相後即刻嚇一跳，搞笑地說：「諗返上年出歌嘅時候，搵咗老闆拍一條宣傳片，希望可以得到佢嘅一句『巴閉』，而家得知呢個欽點嘅故事，真係仲『巴閉』過老闆親口講！」

　完成首場演出後，Andy直言有種如釋重負的感覺，他解釋：「我係一個要好準備晒所有嘢先有安全感嘅人，第一次做音樂劇，真係畀咗好大壓力自己。」他特別感謝台前幕後每一位手足，尤其是微細部份的幫忙。講到最大挑戰，Andy笑指一定是跳舞，「我跳舞嘅經驗真係好少，再加上我覺得自己手長腳長，唔會跳得好好睇，所以就冇咩信心。不過最好彩係今次做Alex呢個角色比較內斂，所以跳得比較細，都貼近嘅。2026兩次跳舞都好深刻，一次啟德跳舞，第二次音樂劇又係跳舞，睇來我真係要認真深造一下！」

　至於首晚有否蝦碌？Andy直言最深刻反而是謝幕一刻，「Onshow嗰陣望出去係漆黑一片，完全見唔到觀眾。到完場一開燈，原來台下咁多觀眾，都有小小嚇親，個樣應該即刻再『Alex啲』。」他謂全程聽到每幕都有歡呼聲及掌聲，非常感動，希望之後場次繼續GoodShow，報答入場支持的每一位觀眾。◇