初踏紅館，羅啟豪（Ramon）偕譚輝智成功舉行《雙聲演唱會》，當晚他倆別出心裁演繹一九八四年勁歌金曲串燒（他們的出生年份），並各自送上個人單曲，加上啟豪自彈自唱、輝智大跳Sodapop，為觀眾帶來連串驚喜！

　一向笑臉迎人、看似冷靜淡定的Ramon，原來在個唱揭幕時，已被感動得幾乎落淚，Ramon憶述：「當舞台緩緩升起，我真係唔相信有咁多觀眾（九成半入座率）入來睇我同輝智嘅演出，但唔可以一開場就喊，唯有盡力去強忍淚水！去到最後一首《今天等我來》，係我同輝智嘅結緣之歌，一聽到歌曲前奏，好多回憶湧上心頭，特別係呢幾年間所發生嘅一切，心裡面都真係非常感動！」

　Ramon確實非常感性，演唱會尾聲播出製作花絮，其中一幕可見Ramon哭成淚人，看得觀眾十分揪心，但即場未有透露原委，Ramon解開謎團：「係因為旦哥（創作總監鄭丹瑞）第一次將開場嗰條AI片畀我同輝智睇，回憶返之前咁多年以為要放棄音樂、擺低音樂，竟然有呢個奇蹟發生喺自己生命裡面，真係好不可思議、好感觸，一時間忍唔住喊咗出來！」

　完騷後翌日醒來，Ramon仍難以相信，自己完成了一個紅館演唱會，對於當晚表現，他說會給自己八十分：「我對《阿Lam日記》好有期望，儘管反覆練習過無數次，最後都係『（口累）』咗兩個字，呢度扣咗自己好多分！」相對較滿意部份，Ramon會選自彈自唱《我的故事》，這也是反應最熱烈的其中一首歌，他說：「呢首係我返香港後先至有機會聽到、為演唱會新學嘅歌。第一次聽已經深深愛上，旋律歌詞都好觸動到我；為咗配合歌名，演出時大熒幕上播出我咁多年所畫嘅畫，畀大家認識我音樂以外嘅另一面，效果我都好滿意！」

　Ramon出名人緣極佳，一班《中年好聲音》家族成員李佳、顏志恒、古淖文、劉威煌、支嚳儀、丁文俊、林彥言、魏嘉信、沈宗賢、馮志豪等拉隊撐場，顏米羔開完工直奔紅館看騷，張與辰未能到場亦有送上花籃，另有演出的黃博則在個人社交平台加油打氣，Ramon說完全收到大家的心意：「我本來有啲緊張，但一見到呢班好朋友，當堂好似輕鬆咗，最搞笑係丁文俊，我未同佢握得切手，監製喺耳機就叫我要返台中間，我同佢講轉頭返來，之後我真係有口齒，佢事後出post話覺得我好有禮貌；顏志恒同魏嘉信以為我聽唔到佢哋叫我除衫，叫我除耳機，我同佢哋做口形話：『我聽到你哋講嘢呀！』佢哋事後好興奮話，第一次有台上歌手咁樣同自己『交流』，佢哋真係我嘅最佳啦啦隊，衷心好多謝佢哋！」慶功宴上，Ramon終能卸下壓力大快朵頤：「呢兩個月來，我都係食青菜、烚雞胸，終於可以同大家擦返餐！完騷之後，仲要陪特登返香港嘅親友食飯，自己趁機食好嘢！」

　完騷後，Ramon將會陸續在社交平台更新演唱會的影片日記，第一條影片揭露當日他竟然是搭地鐵前往紅館，成為極少數搭地鐵去紅館「開工」的貼地歌手，他微笑道：「工作人員聽到都覺得好出奇，但其實我一向以效率為先，亦鍾意一邊行路一邊睇風景，加上我當日冇乜嘢要攞，屋企出發搭兩個站就到，然後一出站過條馬路就係紅館，好直接就覺得一定係搭地鐵！」毫無疑問，從籌備到正式演出，今次演唱會勢將成為Ramon畢生難忘的美好回憶：「每一次開會、每一次練舞、每一次彩排、每一次錄音、同輝智一齊簽八千個手套嘅經歷，仲有呢個舞台，現場嘅歡呼聲同掌聲，望住在座每一位觀眾、家人、朋友、豪殼嘅畫面，我都會永遠記得！」◇