楊千嬅（Miriam Yeung）突然宣佈「生女」？！其實係佢創立嘅全新IP「Am'miri」全球首間限定快閃店，上星期五（5月15日）突發喺深圳一商場靜靜雞「出世」。千嬅笑住話：「我等咗咁多年，終於生咗個女，Torres有個妹啦！哈哈！」

　千嬅就指呢次「高齡產女」過程一啲都唔簡單，好似活動原定下午舉行，但千嬅抵達深圳後，活動場地因有大批歌迷同市民圍觀，因為擔心人潮太洶湧難以控制，所以活動被要求改到清晨開始，搞到佢笑言：「結果我凌晨5點半就起身化妝梳頭，真係生仔都冇咁早起身，哈哈......不過當年生仔，都係一早入醫院準備，所以成朝都有準備生個女嘅心情！」

　而「囡囡」Am'miri呢個形象原來係老公丁子高嘅主意，千嬅透露：「其實丁生希望可以同大家分享生活理念，最終就做咗Am’miri出嚟，足足搞咗3年，今日面世真係好開心。」呢個擁有淡紫色頭髮、精靈耳同純白翅膀嘅天使BB，象徵每個人內心嘅小朋友，溫柔守護初心。千嬅話：「希望Am'miri總會喺你最需要嘅時候出現，用溫柔治癒你。」

　開幕活動中千嬅又分享「囡囡」嘅幾大情緒特質——陪伴、愛、接納、包容、勇氣，而佢個人就特別鐘意「勇氣」：「心口最緊要有個『勇』字，跌都唔使怕！」

　千嬅近年鍾情公仔，不過笑指將會開始變心：「而家多咗個自己親生女，如果可以出毛公仔，第日就可以攬住個女瞓覺，哈哈！」快閃店將營運到27號，亦同步為千嬅今星期喺深圳舉行嘅「春繭」演唱會熱身。◇