有「大眾女友」之稱嘅楊卓欣（Cherry），繼早前推出《彼女育成計劃》寫真大受歡迎，前晚換上一身帶punk味嘅性感短裙，高調現身「龜梨和也香港見面會」追星。呢位由2004年開始已經鍾意龜梨和也、追星足足22年嘅忠實粉絲，當晚幸運地被抽中與偶像近距離互動，更獲得珍貴擁抱，全場粉絲羨慕不已。

　前晚見面會上，當工作人員宣佈抽中上台互動嘅幸運兒係Cherry時，佢當場大腦一片空白，全場觀眾都見到佢激動到喊到好醜，喊到連龜梨和也嘅樣都睇唔清。機會難得之下，Cherry鼓起勇氣張開雙臂，終於成功獲得龜梨和也嘅擁抱。事後佢笑言：「勇敢的人先享受世界，呢句說話真係冇錯。」

　被問到同偶像擁抱嘅感覺，Cherry直言回憶一片模糊：「睇返片段，原來龜梨好似有同我講嘢，但當時我完全冇印象。抱抱嘅觸感都諗唔起，唯一記得清清楚楚嘅，就係龜梨和也身上嘅香氣。」佢仲笑住話，當時頭腦唯一清醒嘅一刻，就係即刻醒起粉絲之間流傳已久嘅「都市傳說」——一定要聞下龜梨香唔香。

　呢個擁抱片段一出，無論現場定線上社交媒體，好多粉絲第一個問題都係：「龜梨香唔香？」Cherry笑言自己成為全場焦點，「平時我運氣好差，永遠唔中獎，今次竟然成為全場唯一最幸運嘅女生，到而家都覺得件事好神奇。」

　佢仲形容當時情景好似偶像劇劇情：「等咗22年，龜梨先飛來我嘅出生地香港，然後佢由舞台上，經過全個會場，一步一步咁走向我。睇返片段，真係覺得好浪漫。」

　在場其他粉絲都好nice，紛紛恭喜Cherry，佢亦好開心即時同大家分享呢份喜悅同好運。楊卓欣最後表示，希望龜梨和也唔好畀香港嘅熱情同急速節奏嚇怕，「一定要再來香港呀！」◇