由《降魔的》《跳躍生命線》方駿釗監製、《他來自江湖》《創世紀》邵麗瓊編審的輕鬆動作喜劇《X Wallet呈獻：臥底嬌娃》，周一至周五晚八點半翡翠台播出。

　今個周四晚（26日）播出的24集《臥底嬌娃》相當催淚，劇中「搞笑擔當」的朱皮／「豬皮」（關曜儁Leo飾），為了拯救「心目中的真正大佬」潘奕風（馬貫東飾）、及《無間道》劉德華上身做一次好人，情願被權世豪（杜燕歌飾）打死也死命要攬實權世豪的腳以確保奕風安全……死得轟烈！

　在第24集，「豬皮」表現絕對是「義氣之巔」，為了幫奕風追查蘇嘉盈（李海銅飾）死亡真相，豬皮主動提出讓阿妙（陳瀅飾）裝偷聽器在自己身上之餘、又經常借故生硬地向權世豪套料；為了救阿風脫險，豬皮更冒險做盡與權世豪對著幹的事情，為了兄弟情及正義，完全將生死置諸道外，亦將豬皮「只要愛上／決定了，便要搏盡無悔」的人物性格展現得相當立體。為配合豬皮慘死劇情，劇組還剪輯了「豬皮」劇中的可愛＋正能量精彩節錄放於片尾roller位，配以由鍾柔美主唱的插曲《角落塵埃》，以及豬皮傻氣又熱血的招牌對白：「我以前冇得揀，而家我想揀做番個好人」，極度催淚；加上「豬皮」角色人設完美，除了口疏一點及誇張一點，基本上零缺點，加上Leo演繹出色，難怪不少網民大為不捨及觸動，紛紛留言表示哀傷，並大讚Leo有喜感、演得好，年尾值得一個獎項肯定：「還我豬皮」「好耐冇試過咁唔想一個角色死」「豬皮做得超好，太感人」「希望有獎項鼓勵下佢」「值得更多機會」「全劇最有愛又最可愛角色。」

　談到場口難忘事，Leo接受官方訪問時透露拍攝時發生了搞笑事：「因為我部電話擺咗喺衫袋，結果想拖佢時成部電話『Dup』咗落佢塊面度。」

　另邵美琪當晚的「巔瘋」演技亦再度搶盡焦點，劇情講述卡邦尼（邵美琪飾）被三位嬌娃佳琪（張曦雯飾）、阿妙及小茹（羅毓儀飾）設局以為愛女寶儀（鍾柔美飾）落入賣淫狂徒手中後，即發瘋般衝上模特兒公司大吵大鬧，「目露凶光」的Maggie數度嬲怒至聲嘶力歇兼眼都凸埋，著急又憤怒的狀態再為劇集留下經典畫面。

　之後，寶儀現身逐點篤爆卡邦尼惡行，面對女兒的痛心指控，卡邦妮大為崩潰兼無地自容，邵美琪演繹時不但雙眼滿是淚光兼口震震，面部肌肉亦數度驚現不受控的痛苦抽搐，配以恍惚的眼神，將日後不知如何面對女兒的角色心理狀況演繹得極有感染力。而在落口供場口，Maggie再度釋出新的演法，以心力交瘁狀態演繹愧疚及內心掙扎，而當Maggie拜託三位嬌娃：「喺我唔喺佢（寶儀）身邊呢段日子，你哋盡量幫我睇住佢」時，Maggie又演繹了之前角色未曾展現過的軟弱，演法極有層次。◇