大型音樂企劃《歲月如歌》 現正於 HOY 77 台熱播，當中就請來兩代歌手MC張天賦，岑寧兒及尹光做嘉賓，這一集就以一直「努力的歌手」作為主題。

　其中以選秀出生的MC就在節目中，重遇當年選秀節目的導師陳潔靈：「當年佢係我哋嗰組嘅導師，佢係掌握我哋所有嘢，佢係我哋嘅大佬！佢決定邊個留低！邊個淘汰！好多謝佢一直愛戴我，保護我，我哋都好多年冇見，今次重遇返係好開心，仲好有親切感，另外Miss Chan Chan同我哋都有個約定，有一日佢開演唱會，會請我哋做嘉賓！點知我自己開演唱會嘅時候，我大意到唔記得請佢做嘉賓！我要即刻返公司在討論下呢件事！」

　前輩尹光於2023年就作出新嘗試，推出一首「Dear Myself 」非常驚喜！光哥都覺得好開心：「呢首歌非常之受歡迎，仲上到叱咤5強，真係好開心！其實呢首歌都改變咗我嘅歌唱生涯，因為我唔識得唱咁抒情咁柔嘅歌曲，你知啦，我之前唱嗰啲都係輕鬆，諧趣，rap嘅歌曲嚟㗎嘛！呢隻歌絕對係一個考驗！」◇