《領廚爭霸戰》正播放得如火如荼，星級評審亦美女如雲，當中包括有名模陳嘉容（Eunice)，一向對美食有要求的Eunice笑言節目請對了人：「我自己對煮嘢就冇乜興趣，但係對食物就好高要求，我淨係會食得精同埋好健康嘅食物，我做評判主要睇返佢嘅用料，烹飪技巧，味道，擺盤，整體呈現嘅賣相，仲有夠唔夠熱，即係溫度都係非常之重要！」

　Eunice近年除了主力直播帶貨，亦有擔任形象及禮儀培訓的工作，工作滿滿的她，戀愛運就好像欠了些：「我個人外表我就比較冷漠，成座冰山咁！對於呢樣嘢我又唔係好敏感，我比較old school啲，我要對方不斷搵我，又不斷有表示，同我傾好多偈，但有時有啲人無端端約我食飯，我會以為係一啲普通朋友，如果唔得閒就會推，可能咁樣就錯失咗好多機會囉！而家我已經盡量降低要求，因為覺得世上冇完美嘅人，我對自己要求高，人哋都好辛苦，所以同我平起平坐就得㗎喇！」

　除了名模陳嘉容之外，靚媽孫慧雪亦是嘉賓評判之一，Eunice表明要求高，相反雪雪就表示完全沒有要求：「其實我好緊張呀！搵我做評判係有啲大鑊嘅，因為我覺得咩都好好食！我啲朋友都話唔好信阿雪呀！佢咩都話好食㗎！但係其實我應該係分辨到嘅！哈哈！」

　對於緊張大師雪雪來講，近期又多了一個煩惱：「大仔就已經返學啦！八歲啦！完全唔使我擔心，但細仔就啱啱上N班，要自己一個人返學，冇爹哋媽咪喺身邊，所以都好擔心，之前做曬心理輔導，買曬啲繪本呀！全部都係關於開開心心上學去之類嘅內容，夜晚就幫佢孭曬書包，跟住我哋成家人就拍手讚佢好叻呀！返學啦！做足曬心理輔導呀！」◇