天星娛樂、棋人娛樂、寶輝娛樂及萬星國際娛樂文化主辦，《阿姐Diva汪明荃演唱會2025》澳門站日前於「澳門百老匯」-百老匯舞台完成，全場爆滿，場面熱鬧。Liza姐一出場先唱出《閃爍登場》和《迷人PINKLADY》，之後她說，：「多謝多謝，大家好嗎？澳門嘅朋友你哋好，來自香港嘅朋友你哋好，來自內地、北京、上海、東莞、順德嘅好多好多朋友都歡迎你哋。真係好耐冇來澳門啦，上一次已經係隔離嘅時候，係2022年，我記得嗰陣時係要隔離14日先可以出來唱歌。」此時剛巧有一位男觀眾遲了進場在找座位，Liza姐看到後說：「小心呀嗰位先生，睇唔睇到個位？你個位好好呀，歡迎你，遲咗小小唔怕，重有好多歌聽，我今晚好開心來到百老滙舞台，大家有冇留意我今次海報嗰個logo呀，睇睇啲字，由左至右讀就係英文嘅DIVA，但係你當睇中文又得喎，係寫住《阿姐》，睇唔睇到呀？所以我覺得呢個logo設偈得好特別，係兩用嘅，其實咩稱呼都係一句啫，無論係DIVA又好，阿姐又好，汪明荃仍然係汪明荃係Liza，我都係將最好嘅一面送畀觀眾，所以好希望大家今晚放開心情，好輕鬆咁聽我唱歌，同埋欣賞我哋為大家安排嘅節目，係度送畀大家嘅係《天虹》。」阿姐唱畢《天虹》後說：「我嘅歌曲裡面電視劇主題曲係佔咗一個好重要嘅位置，今晚當然會有好多首本名曲同埋電視劇主題曲送畀大家聽，你哋睇下我今日呢件衫似唔似一隻金絲雀？送畀大家呢一首《金絲雀》。」在唱過電視劇《秋海棠》及《京華春夢》的歌曲後，Liza姐說：「啱啱睇返好多舊劇照都充滿回憶，現場有好多觀眾可能太細個未睇過呢啲劇集，嗰陣時拍劇通告日接夜，夜接日，都幾辛苦，但亦都好感恩透過呢啲作品拍咗好多好嘅劇，令到大家認識我，係呢幾十年大家都好支持我汪明荃，而家就送畀大家另一首電視劇主題曲《用愛將心偷》。」

　在換過另一套全紅色的服飾後，阿姐再度出場，為大家一口氣唱了《銀河》、《華麗轉身》及《傾城之戀》，接著她說：「頭先跳嗰隻舞好唔好睇？要多謝SunnyWong老師為我編舞，同埋佢都成日同我練舞，總之多謝台前幕後每一個崗位，有佢哋嘅配合先至可以成就一個GoodShow，跟住我就想唱幾首鄧麗君嘅國語歌曲畀大家聽，好唔好？你哋可唔可以開手機燈一齊參與，幫我打拍子，手機燈唔會用大家好多電。」阿姐接著便唱了《甜蜜蜜》、《夜來香》、《月亮代表我的心》和《路邊野花不要採》四首經典國語歌，之後傳來了家英哥的聲音：「好嘢，冇得頂呀，不過阿姐唱歌嘅內容令我好心驚。」阿姐問：「好心驚？」家英哥：「你叫我路邊野花不要採吖嘛。」阿姐：「你自己對號入座啫。」家英哥：「我聽你話所以我路邊野花不要採，我就採我嘅家花。」此時家英哥拿出一枝玫瑰花送給阿姐，家英哥問：「大家認為我係咪一個合格嘅老公？」此時台下掌聲不斷，阿姐：「嘩，好多人撐你呀，大家畀多啲掌聲家英哥。」家英哥：「妳咁樣講法証明你有眼光搵到個好老公。」阿姐：「你講嘢都幾動聽，咁就將以下時間交畀你。」在一番台上打情罵俏後，阿姐便回後台換衣服，家英哥：「多謝晒，其實太后搵我唱歌嘅原因係乜嘢呢？大家知唔知呀？因為我靚仔？想介紹老公畀大家識？梗係唔係啦，因為太后帶咗好多靚衫來，咁啲靚衫係攞來換嘅，咁換衫就需要時間，咁呢個時間搵邊個去《襯》呢？咁梗係搵老公去做啦，所以我想同大家傾下偈，講下嘢，唱下歌，講啲笑話等大家開心下，咁太后就可以去換衫，換完靚衫出來就繼續為大家唱歌，大家係咪繼續咁開心呀？所以我係咪好有用呢？呢個時間我想唱一首歌，呢首歌就係因為每逢4月1號我都好掛住一個朋友，掛住張國榮，我同佢一齊做過好多套戲，包括《金玉滿堂》同《色情男女》等等，同時佢對粵劇都好有興趣，得閒嗰陣佢成日問我啲做手係點，轉個身睇下，揈個水袖睇下，哥哥經常同我傾呢啲偈，所以我哋好多嘢講，係呢個時間我送呢首歌畀大家《儂本多情》。」

　在Encore部份，Liza姐先唱出了《熱咖啡》，接著她說：「我今日係歌手，聽日可以係粵劇嘅演員，我亦都有去做一啲行政嘅工作，為業界做貢獻，每一個崗位我都盡心盡力去做，因為我知道大家對汪明荃係有好高嘅期望，有好多要求，所以我係要不斷改進同增值，係呢度要多謝你哋嘅支持，陪我一齊行呢條娛樂之路，同大家分享《美麗娛樂世界》。」在唱畢演唱會主題曲《Makemyday》後，Liza再度邀請哥出現在台上，他倆合唱了《萬水千山總是情》，並為今次演唱會澳門站劃上圓美句號。《阿姐Diva汪明荃演唱會2025》即將分別於5月3日在上海亦即阿姐的家鄉和6月13日在廣州舉行。◇