TVB藝員許家傑（Jack）及羅天宇（Joey）一向熱愛籃球，並跟圈中籃球好手組織Hero籃球隊參與不少慈善活動。前日（11月9日）Jack和Joey獲「獅子會」邀請現身筲箕灣官立中學出席「獅子會全港學生三人籃球賽」活動，除了擔任開禮及頒獎嘉賓外，兩人換上球隊的醒神隊服，參與兩場友誼賽，分別跟香港兩位甲組球員及區職員作賽，最終一勝一負，打和收場。雖然今日掛起1號風球，但無減大家的熱情，不少學生見到Jack同Joey都非常興奮，主動要求簽名及合照，兩人都大方「有求必應」，相當親民，學生更搞笑同Jack講：「平時《愛回家》睇慣你著西裝，原來真人咁大隻！」而Joey在《巾幗梟雄之懸崖》中飾演酷爆的「偉豪」一角，在籃球場上展露陽光笑容，冧爆一眾圍觀的學生及市民。

　Jack今年跟隨球隊Hero到不同學校SchoolTour，教學生打籃球，今次正式落場對戰，他表示：「今日打得好開心，勝負都唔重要，最緊要大家開心。好彩個風球銀杏未殺到嚟，活動可以如期舉行，同班學生打波切磋，我同Joey都好耐冇一齊打波，有種久別重逢嘅感覺，因為大家都各有各忙，拍劇同做生意都好忙，今日難得見面，打波之餘都有交換下生意經。（對住學生有冇「放水」揸流灘？）梗係冇啦，而家啲學生好勁，U8、U12嘅成員都有，打得好勁，我當年呢個年紀仲係一舊蕃薯。」

　Joey自嘲失準，多次「三分球」都「大炒」，他說：「好耐冇打籃球，知道今日有活動，前兩日都有打，希望攞番手感，不過三分波真係失威，好彩籃底都仲可以，今日靠晒隊長許家傑Cover！」他表示近日忙於為劇集宣傳，感激監製方駿釗大膽起用他演動作戲，一圓男孩子的英雄夢，亦因此吸引到不少內地的粉絲支持，他特別完成柴灣活動後，趕到荃灣出席劇集宣傳，跟粉絲們見面兼合照。◇