全球矚目的美國總統大選塵埃落定，結果由特朗普大比數勝出再度入主白宮，HOY TV風水命理節目《見招拆招風水局》特別篇於大選前請來不同玄學家預測，結果多位師傅都成功預測特朗普當選，特別七仙羽用靈擺預測，令網民嘖嘖稱奇，仲係網上引起熱烈討論。七師傅開心得笑不攏嘴：「其實我都忙緊拍節目都唔知，係啲網民第一時間話我知，好多人傳訊息恭喜我，之前我預測特首、總統都准架，上次都預測咗林鄭月娥做特首，每次都準㗎！」佢又分析特朗普嘅為人：「佢嘅長處就係自信、自負，以一個差唔多八十歲嘅阿伯來講，佢都算好有毅力，因為好多七、八十歲嘅阿伯七、八點就瞓覺啦，因為養生嘛，佢仲要七、八點出來演講，剩係呢啲魄力、毅力，好值得我哋學習，佢畀人暗殺都無驚，仲要繼續出來，都幾堅強，佢個樣都係似成功人士。」七師傅又預告之後都會幫HOY拍新年節目「開運秘笈」，會同大家分享2025年嘅事業運、工作運，愛情運，包保有新料益大家。

　呢晚七師傅一身皮褸型格打扮，撞樣荷里活新片女主角Lucy Liu，佢就多謝對方帶來好多奇遇：「啲人以為我入咗荷里活，我親自證明畀你睇，我入咗邊度。初時我都唔知，好多人送禮物畀我，恭喜我入荷里活，其實我前排都有去荷里活（廣場）飲茶，咦！我去荷里活（廣場）飲茶都有人知，不過咁多人送禮畀我，有送花、仲有個送幾萬蚊嘅金畀我，我問佢做咩送金畀我？佢話你係華人嘅驕傲，衝出荷里活，我話唔駛客氣啦，你都可以去㗎嗎，荷里活（廣場）咁近，佢話唔係，我哋無資格，後尾我先知誤會咗，我話你誤會咗，我將個金畀返你好唔好？佢話我唔要啦，你謙虛啫，就係你啊，我係戲院門口見到嘅係你，你唔認啫，我點講啲人都唔信。雖然Lucy Liu套戲未上畫，我已經賺咗好多啦，有衫，有手袋，乜都有啦依家，好開心。將來如果有一日見到Lucy Liu會同佢Sheck hands and sayhi，Yah！亦都多謝佢，因為佢我收到好多禮物。」佢又話無諗過去荷里活發展，因為香港嘅工作已經令佢應接不暇啦！◇