尹光日前現身香港開電視節目《開工大吉77》，接受苑瓊丹訪問。尹光出生越南，被苑仔笑稱為「富二代」，他表示當年因逃避兵役，所以移民到香港：「爸爸經營好多行業，好似電影院、髮型屋等等，當時戲院不論係播大戲定電影，我屋企都有個喇叭聽到晒，可能係咁就開始鍾意呢行。後來我同細佬嚟到香港，但係點都搵唔到工作，最終朋友介紹我去唱歌，起初每晚喺荔園『粵曲歌壇』唱兩首粵曲，都有一、二百人睇！」。尹光後期轉戰夜總會任歌手，但選曲成為另一個難題：「因為要唱國語歌，而我國語唔標準啊，學得八首歌，要請求其他歌手唱第二啲。人生第一個拍檔係鍾叮噹，一齊做電視台節目，收工之後就要幫啲粵曲改歌詞，後期到我推出《十四哥》呢首歌，當年好受歡迎，廟街街頭播到街尾，最終大家叫我做『廟街王子』。」

　多次紅館開個唱，更場場爆滿成為佳話，尹光感恩伯樂張耀榮賞識：「當年張生做完其他人演唱會，仲有幾日檔期唔知搵邊個攝，原來佢鍾意聽我唱歌，所以託人同我接洽，當時一萬二千個位，賣咗兩個星期飛，都係賣得二、三百張，嚇到我同張生講『我唔做啦，我退番啲訂金俾你』，佢話唔得要繼續做。到開騷當日我去化妝，老婆話出面排晒隊買飛，我唔信！要親自出去睇吓，真係打咗幾個蛇餅，賣飛賣到夜晚九點幾，最終都九千人入場，係一個奇蹟。」

　尹光就話海外登台常收到Fans贈送的「銀紙牌」禮物，足跡遍佈全球各地：「我試過法國唱咗兩個月，入場全部都係華人！有一次澳洲賣唱片，有個當地人走嚟幫襯，又試過一年內去美國唱足十四場。近年我就專注同後生仔合作，我梗係唔夠啲年輕人Rap，佢地啲動作好睇好多，唔及佢地咁新潮！」

　二人不時正笠高帽，尹光大讚苑仔搞氣氛一流，對方曾任自己個唱嘉賓，靠把口「氹」得全場發笑：「依家我都想做場Live演唱會，不過我好懶又唔識搞呢啲嘢，所以叫苑仔幫手，佢夠膽搞我就夠敢唱，一齊玩吓新嘢。」◇