今屆奧運，HOY找來有「牛下女車神」之稱，奧運兩銅得主李慧詩（Sarah），擔任巴黎奧運評述，經過多日的參與，Sarah不是太滿意自己的表現：「一開始自己非常緊張，我覺得有好多可以改善嘅地方，因為我講嘢有時好極端，講嘢無端端好港女，例如你永遠都係咁㗎啦！用啲好港女嘅詞語囉！但係其實我唔係有心，希望繼續可以邊評述邊學習。」

　問到今次擔任奧運評述的形象，Sarah就説沒有設計過：「因為上年做亞運時係有諗過形象，想搞下新意，今次做奧運就完全冇諗過，因為希望可以用實力取勝！亦都想認真去做好呢份工作，但都好多謝好多網民喺我社交媒體度畀我嘅意見，例如手勢及髮型等等，多謝你哋為我加油！」

　問到日前和多年好友石偉雄連線對話，及後更於網上發表感性宣言，Sarah坦言因為心痛對方：「因為我同佢係喺大家籍籍無名已經認識，我同佢嘅關係好難去講出來，其實我感恩佢冇事，我亦有再次同佢通電話，好開心佢仍然堅持去美國（比賽），無論經過幾次失敗，都繼續嘗試，絕對係勇氣可嘉，永不放棄嘅精神。」

　HOY於今屆奧運，評述猛將如雲，當中包括資深體育評述員，有體育字典稱譽的徐嘉樂及港隊游泳教練崔瑋俊，問到對香港對於奧運的表現，徐嘉樂直豎拇指：「當中張家朗嘅表現令人非常之佩服！佢好享受打逆境劍，尤其係14比14絕地一劍嘅時候，其他運動員可能承受唔到，但係就係佢最有發揮嘅一刻！」嘉樂更表示HOY今年的劍擊評述是創造香港歷史：「我哋破天荒請咗四位劍擊高手張小倫、朱嘉望、RingoLo同顏冠一來評述，絕對係港劍史上最好睇嘅一次！」

　而對於何詩蓓的表現，崔教練就覺得她已發揮水準，在銅牌賽之中更拉近咗同兩位出色澳洲選手嘅距離，我不嬲對佢都充滿信心！」◇