「凍齡港姐」吳婉芳做奶奶喇！佢嘅二仔胡智同喺5月23日同另一半低調舉行婚禮，雖然只邀請至親好友出席，不過出席份量十足，星光熠熠。

　作為胡智同契爺嘅張學友吳婉芳好友曾志偉都坐喺主家席見證新人成婚，而早年結義嘅好友鄭伊健同老婆蒙嘉慧、唐鶴德、以及許晉亨及李嘉欣亦係賓客之一。結婚儀式結束後，吳婉芳同學友喺台下合唱《愛是永恆》向一對新人送上祝福，呢一幕更將現場氣氛推向高潮，溫馨熱鬧，獎門人更拎出手機拍向好友以及新郎、新娘。

　除咗星級賓客吸睛，新奶奶吳婉芳喺呢晚嘅穿搭優雅不失華麗，尤其係佢配戴嘅珍貴翡翠珠鏈非常搶眼。雖然吳婉芳即將到達花甲之年，但保養得宜嘅佢，皮膚容貌超凍齡，身形體態一啲都冇變，令唔少網民都形容佢有「不老神話」，歲月根本冇喺佢身上留下任何痕跡。◇