炎明熹Gi-FORCE演唱会星期六晚举行第二场，Gigi嘅父母、声梦同伴姚焯菲同森美都到场支持。经过第一场演出之后，Gigi状态明显更放更投入，尤其於Dance Medley环节，继续狂跳近13分钟，表现挥洒自如。首场访问表示要好好感谢自己条「腰」嘅佢，唱到《Little Magic》时，台下歌迷亦起身跟住跳舞同大合唱，气氛比起首场更热烈。

　前晚有歌迷知道Gigi开骚压力唔细，别出心裁製作「炎明熹我地（哋）真係好锺意你」巨型纸牌，而呢晚纸牌就换上「I LOVE U 300000」字样，务求令Gigi放鬆心情。

　演唱中段，Gigi同乐迷打倾谈时搞笑问大家，自己係咪适合做「气氛担当」，点知随即要献唱《流沙》嘅佢，突然狂拨鼻樑，原来係眼妆闪片甩脱，佢整理时又不经意变成斗鸡眼，场面引来全场哄笑。

　到嘉宾环节，Gigi邀请咗喺《青春本我》中饰演佢爸爸嘅姜皓文「父女团聚」，黑哥指知道「囡囡」拍《还有一艘救生舱》 MV时演技大爆发，镜头前话喊就喊，呢日更被演唱会导演吩咐要考验Gigi演技，要佢即场展示「喜怒哀乐」情绪。

　Gigi就自嘲演戏时总係尴尴尬尬，黑哥就安慰佢话：「咁我个女啲喜怒哀乐表情係差唔多嘅，但係佢呢个招牌笑容，真係第二个搵唔到。」之后Gigi亦「礼尚往来」反考验「爸爸」演技，身为演技派嘅黑哥驾轻就熟，仲以夸张表情搞气氛，令台下笑声不断。

　互考演技后，黑哥又大爆笑料，指当日拍摄时团队叫糖水宵夜：「咁我哋畀张糖水纸佢拣，佢就问係咪点叫都得㗎？我话『係吖，你叫几多碗都得。』跟住佢话『哗，你哋好有钱呀！』我呢个女真係单纯到好可爱，搞到我呢个做爸爸嘅有啲担心，我当然唔惊台下嘅观众呃你，因为你哋锡佢都嚟唔切。」

　最后Gigi送上绣有Black Pa（黑爸）嘅运动毛巾答谢，黑哥就祝福Gigi希望佢可以红遍整个宇宙。一向演技一流嘅黑哥，其实歌喉一样劲，呢日佢就开金口献唱Gigi嘅《好想约你》，佢话：「呢首歌係三日前同个女一齐拣，阿女话我唱慢啲，个感觉会好唔同喎，佢唱完呢首歌之后，我都去多咗嗰间快餐店食嘢。」之后佢再为大家送上《铁塔凌云》台下亦响遍掌声。

　另外，校长谭咏麟虽然未能欣赏演唱会，不过亦趁Gigi綵排期间，带同果篮到场支持，又於社交网站发帖，讚Gigi外型同唱功都係可造之才。Gigi感激咁话：「好开心校长咁忙都嚟睇我綵排，佢嘅支持畀咗好多信心我，真係好多谢佢。」

　Gigi嘅演唱会已完成两场演出，外界口碑一致叫好，而佢嘅新歌《还有一艘救生舱》MV，於影片网站上架短短4日已超过100万点击，开show期间新MV照样被狂loop，荣登热门音乐影片第2位。◇