熊黛林、陳嘉寶親子佈置賀中秋 劉沛蘅keep弗戒食月餅

 一年一度的中秋節到了!Cool Style旗下一班藝人熊黛林(Lynn)、陳嘉寶(Anjaylia)、陳毅燊(ANSONBEAN)與劉沛蘅(Hillary)等,齊心送上祝福,祝願大家平安團圓,中秋佳節愉快!

 中秋節是中國最傳統的節日之一,Lynn非常重視,今年Lynn與兩位寶貝女兒Kaylor與Lyvia一同花心思在家中佈置,製作小燈籠、貼貼紙,共度親子時光。Lynn說:「今年中秋節真係好難忘,因為BB之前仲細,未明白中秋節嘅意思,佢哋已經開始慢慢長大,今年已經明白乜嘢係中秋節,我都有同佢哋講月亮上面有個姐姐叫嫦娥,入面仲有隻兔仔,佢哋好開心……今年仲可以同佢哋一齊佈置吓屋企、開心吓,又可以當一個親子活動,同時都會教佢哋中秋節嘅傳統習俗,今年同佢哋過一個開開心心嘅中秋。」

 已為人妻,要照顧兩個寶貝女,同時亦要保持適量的工作,Lynn本來要到內地工作,她笑言幸好工作的檔期有所延遲,令她可以與家人在港共度佳節、團團圓圓,Lynn說:「今年好好彩可以留喺香港過中秋節,我哋係比較傳統嘅家庭,所以每逢過節都會一家人齊齊整整咁食一餐飯,今年更加唔例外,會同BB嘅嫲嫲、爸爸媽媽、姑媽一齊大家庭咁過節。」

 將於年底生B的Anjaylia今年中秋節一如既往,與家人熱鬧共度,她更專誠走訪老式的燈籠店尋找兒時回憶,Anjaylia說:「中秋節傳統會同屋企人一齊食飯,食完飯後最開心嘅都係食,哈哈。媽咪會整芋頭仔、買碌柚、有唔同款式嘅月餅,林林總總,鋪到全枱面都係,大人會一齊開心一邊食一邊傾偈,小朋友就玩燈籠。我最難忘係細個嘅時候有一個用玻璃紙做宮廷款式嘅燈籠,大個咗想搵返嗰款燈籠嘅時候,已經搵唔返。因為囡囡已經識得玩燈籠,所以今年特登去返傳統嘅舖頭問吓有冇呢款宮燈,可惜師傅話冇做嘞,最後揀咗小金魚燈籠畀囡囡。」Anjaylia笑言有跟兩女一同製作DIY燈籠,可惜未到中秋節,燈籠已被「解體」,十分搞笑!◇