張建聲（Justin）和陳意嵐（Tarah）前晚在葵涌開live，為viuTV播映的《向西聞記》單元《咖喱雞》造勢，Justin好友喇英更特別為兩人炮製自家咖喱雞及手工意粉。

　戲中Tarah因為失戀醉酒而與鹹濕仔同事Justin發生一夜情，但她將甩拖情緒發洩在對方身上，脫掉他的皮帶係咁鞭，當日Tarah拍時埋牙堅打鞭鞭有力，打到Justin成個背脊又紅又腫，Justin憶述當時導演冇嗌cut，又問Tarah打他有否一吓暗爽，她即說：「冇喎，咁知你痛吖嘛，我唔明啲人點樣搵到樂趣。」

　兩位演員前晚一齊重看《咖喱雞》，播到Tarah錫冇着衫的Justin背脊時，她突然問：「你當時有抹乾淨個人㗎呵？」Justin極衰回應：「我係拍戲夜班接早班嚟，仲拍完場打戲。」二人互窒之餘，但都希望《向西聞記》將來可以開到下一季，他們可以繼續發展做一對SM情侶。

　開live期間，有網友問Justin「你真係M（受虐狂）？」Justin大笑反問：「嚟嗰啲呀？哈哈哈~~~我知，『攻』同『守』吖嘛。」Tarah卻好奇問他「M」定「S」（虐待狂）比較開心，還是兩者都ok？Justin說：「我真係諗吓...你嗰個（鞭打）就睇醫生啦。要揀嘅話，我打唔落手，我點打你呀？你死架喎。」Tarah笑言自己身形高大頂得住，更說：「我覺得思想應該開放啲，可能他朝有一日我遇到個男朋友兩樣（SM）都喜歡可以試下，唔知架，要遇到個對手先激發到你潛能。」Justin聞言即刻「嘩嘩」聲，覺得Tarah能「攻」能「守」好利害。◇