容祖兒請來古天樂唱歌觀眾興奮到癲

 容祖兒Pretty Crazy演唱會第十一場請來今期流行最受歡迎男歌星古天樂到場。古仔第一次現場又唱又跳〈今期流行〉,令觀眾興奮到癲,叫聲震裂整個紅館。

 昨晚嘉賓未出場,祖兒叫大家一齊估係邊個,「這位男神,全港冇人唔鍾意佢,佢呢由細到大都好錫我,佢曾經係我演唱會擔任過一次演唱會嘉賓,今日想大家送份禮物俾呢位嘉賓,做下 dancer,一陣音樂起,適當時侯就記住一齊做呢動作....」然後祖兒就跳起〈今期流行〉的「拜神舞」動作,全場萬多人即時瘋狂起哄,現場亦響起《今期流行》歌音樂,古仔破天荒第一次現場演釋這首歌,全場都激動非常,古仔一邊唱一邊跟觀眾握手,氣氛之熱烈一時無兩,整個紅館像被叫聲快要震裂一樣。歌畢,祖兒話,「我第十一場表演嘉賓古天樂,真係癲倒眾生呀!」

 古天樂唱完就對大家講:「第一件事,我係病緊,第二件事,我想講〈今期流行〉我從來未live唱過!」祖兒:「係呀,佢呢輩子未現場演釋過呢首經典金曲。你真係好錫我呀你,你係咪前世欠咗我㗎?哈哈,你記唔記得你好多年前做過我演唱會嘉賓?」古仔話,「你真係當我老人痴呆症喎。我以前同你影過張相嘛。」祖兒話,「係呀,個時你重拍緊劇,我係電視台撞到你,當然係唔會放過機會啦,就係呢張相溝掂你!哈哈,我講笑。你個陣好白㗎,不過咁而家都唔係好黑....」引得觀眾哈哈大笑。

 古仔等祖兒講完,突然就話,「唔知點解,我有的谷鬼氣,我都話,唔好載Earmon,又叫我載Earmon,聽不到現場聲音呀!我想講!唱多次!火滾!」然後望住好愕然的祖兒,「點呀,你驚overrun?你係咪都加咗場啦。」祖兒就笑住話,「唔驚,我畀你唱埋落去都重得!呢個人真係好鍾意唱歌㗎!」 接著,兩人再一次唱《今期流行》,古仔今次不單唱,重跳舞埋,觀眾大合唱之餘亦為之瘋狂,瘋狂叫裂咗個紅館!

 唱完歌,祖兒細心幫古仔抹汗,「你唱到喘氣啦,抖抖先啦,最受歡迎男歌手.....」不過,最受歡迎男歌手冇抖不特止,重將觀眾情緒推到最高鋒,竟然話「而家玩個遊戲,我知祖兒呢十一場都未同大家影過相,而家四邊,邊個叫得大聲,我聽到就搵佢上來影合照!」

 祖兒說:「向來都知道古天樂個人好好,佢雖然外表好似好惡,但係佢內心好善良.....不過你搞到咁,接住落來的嘉賓唔知點算.......哈哈哈.......你去揀啦,揀個靚仔的上來影啦」最終揀咗三個觀眾上台合照,開心死觀眾。

 影完相,古仔想走人,「我同你講接觸下人,大家開心的咪好囉。我走啦。」但祖兒就拉住古仔唔肯放,「你咁鍾意唱歌,你唱多首啦。觀眾再次歡呼,古仔於是留下來同祖兒再合唱《男朋友》再離開。

 此外,昨晚楊受成夫婦,周焯華、蔡一智等均有來捧場。◇