張建聲孖女友跑六場謝票 觀眾嗌陳浩民何珮瑜開續集

 原著向西村上春樹作品、向西三部曲之最終章《作家的謊言:筆忠誘罪》,在剛過去的三天假期舉行了六場優先場,身為男主角兼聯合監製的張建聲寧舍緊張,偕同片演員女友陳嘉莉及編劇沈錫然跑勻港九去足六場,而且每場都問現場觀眾反應,難得今次賣飛成績不俗,觀眾都對懸疑的結局大感意外及驚喜。

 除了張建聲和陳嘉莉和編劇外,趙永洪、導演孫立基及配樂師江暉等亦分別加入謝票陣營,前日女主角何珮瑜(Jeana)和陳浩民亦專程撐場,久違的陳浩民笑言自己拍開神怪劇,所以希望觀眾支持,因他在片內飾演一個觀人於微、有如福爾摩斯的差人,跟過往演出大不同,而觀眾們對浩民好有親切感,又猛話睇到好驚好緊張,認為這部戲夠條件拍續集,為一眾演員注強心針,Jeana亦說:「我有為呢部戲增肥,見到大家都鍾意呢部戲梗係開心啦,付出係值嘅。」

 至於Justin就表示唔怕辛苦,最緊要睇到觀眾對部戲滿意同受落,他表示:「普遍上都係正評,其實大家都盡量客觀,但係出乎意料嘅好,希望跑多啲優先場謝票啦,我哋會靠毅力一步步做,咁就心滿意足,依家距離正式上映仲有啲時間,都想觀眾去我個社交平台討論吓部戲,因為有咩地方改善仲可以再改。」◇