余香凝:決定拍床戲就會豁出去

 余香凝(Jennifer)昨日接受新城訪問,講到她憑兩套電影分別角逐金像獎的「最佳女主角」及「最佳女配角」,她表示,能夠入圍已很值得鼓舞和很大的肯定,但她沒有信心奪獎。Jennifer說:「因為其他競爭對手太強,我睇晒所有電影,鍾意其他演員,特別女主角我就鍾意《三夫》的曾美慧孜,配角就是惠英紅同周家怡,好犀利,其實我入行短短三年,有得提名已經好好,知自己還有好多不足地方,要再繼續努力同埋浸多啲經驗,先夠膽諗攞獎。」

 講到《三夫》意識很大膽,問可會夠膽接拍?Jennifer說:「睇劇本,如果係陳果導演,同埋成個劇本同拍攝咁好,我會呀,演員成個身體都係用嚟演戲,頭髮都可以係演戲嘅一部份,所以配合劇本、導演要求、呈現出嚟嘅效果,我覺得唔係好大問題。(但要全裸你都得?)全裸唔係令我覺得好嘅地方,最令我覺得勁係佢嘅演技,唔係淨係除衫,佢嘅角色係有輕度智障,好難演,同埋佢要增肥,好犀利。(如果有需要全裸你唔介意?)真係要睇有冇咁嘅需要,如果好鍾意個劇本都會,其實我連床戲都未試過,可能到時都會緊張同驚,但決定咗做嗰樣嘢就會豁出去,有後顧之憂就會做得唔好。(未拍過床戲?)係呀,可能我太高,冇乜拍愛情戲,想拍愛情戲,之後四月有機會拍。」

 問選了戰衣未?Jennifer說:「未呀!要先減肥,我最近戒了些生活習慣,以前我會靠食酵素幫腸胃排毒,但最近覺得不好依賴,所以就變了好吸收,肥了好多,所以要勤力做運動,尋日同妹妹做空中瑜伽,一倒吊完企番起身好暈、耳鳴,那一刻好驚死,驚會不會有咩事,所以即刻深呼吸抖一下。(唔敢再玩?)又唔會,一次生兩次熟。(諗住減幾多磅?)覺得二十五歲呢個關口真係會肥小小,我希望可以去番拍《骨妹》時咁瘦,所以想減十磅,但減到八磅已經好開心。」◇